Gal 2 | YML | STEP | A miamia, mulieta malamala 14 i 'a'avana, Yaubada yana nuanua i sivemageseni 'waikuye, nuanuana a na laka Ielusalema. Bega iada Banabasa taiadi 'a nago, wata Taito a voneni ma fuema 'a laka. 'A lakaga, tovetumaganavo 'adi to'edakumetavo 'aise'avadi taiadi 'a veifufu, yaku 'aseta Iesu Valana 'Atumaina faifaina a sivemageseni 'waidie, Valanina 'wainega a lalau'age mali tomotoga taunidi kebu Diu 'waidie. Yau a lalau'agega tomotoga yada ve'atumai Yaubada mataneye faifaina, a vo, Ta na vetumaganamo Iesu Keliso 'waineye nika ta na ve'atumai.” We'e 'ifwaidi tomotoga i vo, Kebu, nagami Diu ve'etoboda wata veimea ta na vematayakeyakedi wata Yaubada yana tugusa bunu 'aibobo ta na 'ewai, mulieta Yaubada i na awave'atumaieda.” Fai bani'odi i voneyediga yaku lau'age vetumagana'ava 'wainega ta na ve'atumaiga, a sivemageseni to'edakumetanidi 'waidie, kebu nuanuaku yaku folova basenadi 'alo tutuya de'e i na awavesakoyeni, nuanuaku yaku 'asetanina i na awave'atumaieni. Yaku veifufu i nogai, i sosoana we'e 'aku 'weabu Taito, taunina kebu tomogo Diu, siwe kebu i da lukakadeniga bunu 'aibobo faifaina. We'e tomotoga 'ifwaidi igodina taunidi tovetumagana yadi vaiseba i lukuma yama va'auta 'waineye nuanuadi Taito bunu 'aibobo i na 'ewai. Tomotoganidi wata nuanuadi yama vona i na nogai bega i na awavesakoyema fai 'a vo, Ta miave'itubama Iesu Keliso taiadi bega i yavuda me Diu yama ve'etoboda 'adi vematayakayaka 'waidiega.” Tomotoganidi igodi nuanuadi ve'etoboda matatabuna ta na vematayakeyakedi 'wa da vo nuanuadi ve'etobodanidi i da yogonida.

Galatians 2

Tomata'aulele 'ifwaidi Faulo yana lau'age i awave'atumaieni.

1 A miamia, mulieta malamala 14 i 'a'avana, Yaubada yana nuanua i sivemageseni 'waikuye, nuanuana a na laka Ielusalema. Bega iada Banabasa taiadi 'a nago, wata Taito a voneni ma fuema 'a laka. 'A lakaga, tovetumaganavo 'adi to'edakumetavo 'aise'avadi taiadi 'a veifufu, yaku 'aseta Iesu Valana 'Atumaina faifaina a sivemageseni 'waidie, Valanina 'wainega a lalau'age mali tomotoga taunidi kebu Diu 'waidie. Yau a lalau'agega tomotoga yada ve'atumai Yaubada mataneye faifaina, a vo, Ta na vetumaganamo Iesu Keliso 'waineye nika ta na ve'atumai.” We'e 'ifwaidi tomotoga i vo, Kebu, nagami Diu ve'etoboda wata veimea ta na vematayakeyakedi wata Yaubada yana tugusa bunu 'aibobo ta na 'ewai, mulieta Yaubada i na awave'atumaieda.” Fai bani'odi i voneyediga yaku lau'age vetumagana'ava 'wainega ta na ve'atumaiga, a sivemageseni to'edakumetanidi 'waidie, kebu nuanuaku yaku folova basenadi 'alo tutuya de'e i na awavesakoyeni, nuanuaku yaku 'asetanina i na awave'atumaieni. Yaku veifufu i nogai, i sosoana we'e 'aku 'weabu Taito, taunina kebu tomogo Diu, siwe kebu i da lukakadeniga bunu 'aibobo faifaina. We'e tomotoga 'ifwaidi igodina taunidi tovetumagana yadi vaiseba i lukuma yama va'auta 'waineye nuanuadi Taito bunu 'aibobo i na 'ewai. Tomotoganidi wata nuanuadi yama vona i na nogai bega i na awavesakoyema fai 'a vo, Ta miave'itubama Iesu Keliso taiadi bega i yavuda me Diu yama ve'etoboda 'adi vematayakayaka 'waidiega.” Tomotoganidi igodi nuanuadi ve'etoboda matatabuna ta na vematayakeyakedi 'wa da vo nuanuadi ve'etobodanidi i da yogonida. 5 Yadi nuanuananina kebu tamu sai'afo 'a da awave'atumaieni. 'Ako 'a da awave'atumaieniga, Keliso Valana 'Atumaina 'ana nuanua tonovidi i da 'ivesakoi, nuanuama Valananina i na 'eno'eno 'waimie 'atumai'avana.

6 To'edakumetanidi ma 'adi ve'ililibu taiadi 'a va'autaga, kebu tamu nani tulina i da voneku, i awave'atumaiekumo. Vona mogitana taunidi to'edakumeta bwaikidi, siwe kebu faifaidi a da nuanua fai Yaubada mataneye matatabuda ta vesala, siaidi wata bwaikidi. 7 To'edakumetanidi kebu tamu nani tulina faifaina i da vona 'waikuye we'e mogitana i vo, Yaubada Faulo i venua'ivineni Iesu Valana 'Atumaina i na lau'age mali tomotoga taunidi kebu Diu 'waidie, bani'odi wata Fita i venua'ivineni i na lau'age me Diu 'waidie.” 8 I vonaga fai i 'asetai Yaubada yana toketokena 'wainega a vetomata'aulele mali tomotoga taunidi kebu Diu 'waimie, bani'odi wata Fita i vetomata'aulele me Diu 'waidie Yaubada yana toketokena 'wainega. 9 Iemesa, Fita wata Ioni, taunidi to'edakumeta toketokedi ma 'adi ve'ililibu, tutuyanina i 'asetai Yaubada ma yana nuakalikali folovanina i veleku, begaidi taiadi 'a vedima'abi, wata Banabasa, 'eba 'isa ma fuemeye 'a folofolova, Fita ma enavo me Diu 'waidie we'e 'ima mali tomotoga 'waimie. 10 'A vedima'abi i 'a'avana, nani 'aitamogana faifaina i vona 'waikuye. Nuanuadi tovetumaganavo i vewekowekoma 'adi 'aivaita faifaina 'a na nuanua, naninina faifaina 'akonadi a toke a vevetafewa.

S4-5 Fol 15:1,24S6 Fol 10:34S9-10 Fol 11:29-30

Fita yana sauluva faifaina Faulo i awavesakoyeni.

11 Yau a miamia 'atamana Anitioki, mulieta Fita i wai. Bei 'a miamia Fita tamu sauluva 'ana 'isa kebu 'atumainaga i 'idewai, begaidi tomotoga matadie a tolimatani. 12 Tamu me Diu yama ve'etoboda kebu mali tomotoga taiadi i na 'ani. Fita, kumanina nagami tomogo Diu wata mali tomotoga taunidi kebu me Diu siwe 'akonadi i vetumaganaga, matatabuma taiadi 'a 'ani'ani, tovetumagananidi i vo, Vetumagana'ava 'wainega 'a ve'atumai Yaubada mataneye, we'e kebu me Diu yadi veimea 'adi vematayakayaka 'waidiega.” Mulieta 'ifwaidi tovetumagana, taunidi tomotoga Diu, Iemesa i vetunediga i le'wai. Tutuyanina Fita i 'isedi i kololo i vo, Tovetumagananidi me Diu yama ve'etoboda i vevematayakeyakedi wata nuanuadi mali tomotoga i vetumaganaga Iesu 'waineye bunu 'aibobo i na 'ewai wata ve'etoboda matatabuna i na 'i'idewadi. 'Ai'edi i na 'iseku mali tomotoga taunidi kebu Diu taiadi 'a 'ani'ani, bola i na awavesakoyeku.” Fita yana nuanuananina faifaina enavo i bailedi kebu taiadi i da 'ani'ani. 13 Tovetumagana 'ifwaidi taunidi me Diu, Fita i 'iseni 'ani i baibaila, taunidi wata i kololo i ve'alabaibaila. We'e Banabasa i 'isedi wata i nuani i baila.

14 Tutuyanina a 'isedi, Iesu Valana 'Atumaina 'ana 'eda mogitana kebu 'waineamo i da nunago, begaidi Fita a voneni 'aila'a matadie a vo, 'Omu mogitana tomogo Diu, siwe basenadi 'u vetumagana Iesu 'waineye, sauluva Diu 'u bailedi, mali tomotoga taunidi kebu Diu yadi sauluva 'u 'ewadi. We'e tutuya de'e awale tovetumagana taunidi kebu Diu yamu sauluvayega 'u lulukakadedi me Diu yada sauluva i na vetutuyamedi.

15 Tamadavo wata inadavo me Diu, bega 'ida wata me Diu, 'ida kebu mali tomotoga kumanidiavo ta golegoledi tosakona. 16 Siwe yada 'aseta vetumagana'ava 'wainega ta ve'atumai bega ta vo, Egavo ma yadi vetumagana taunidi i na tauyedi Iesu Keliso 'waineye Yaubada i na 'ive'atumaidi, we'e ve'etobodanidi i maiga Mosese 'wainega i na vematayakeyakediga 'waidiega kebu i na ve'atumai.” Wata 'ida bani'odi yada vetumagana ta yatoi Iesu Keliso 'waineye bega ta ve'atumai Yaubada mataneye, 'ada 'ive'atumainina ta veluagaiga fai ta vetumagana Keliso 'waineye, we'e kebu ve'etoboda 'adi vematayakayaka 'waidiega. Kebu tamu aitoi 'ana fata i na ve'atumai Yaubada mataneye ve'etoboda 'adi vematayakayaka 'waidiega.

17 Fai nuanuada ta na ve'atumai Yaubada mataneye bega ta miave'itubama Keliso taiadi. Fai bani'odi ta vetumagana Keliso 'waineye, bega me Diu i vonavona i vo, Tovetumagananidi tosakona, yada ve'etoboda kebu i da vevematayakeyakedi, Keliso i kiavebe'udi i sakosakona.” I vekali, kebu bani'odiga. 18 Igodi tomotoga 'adi 'ive'atumai ve'etoboda 'adi vematayakayaka 'waidiega yau a talabodeni, siwe 'ai'edi tutuya de'e a na awave'atumaieni a na vo, Ta na vetumagana siwe wata ve'etobodanidi ta na vematayakeyakedi nika ta na ve'atumai,” mogitana yau Yaubada yana nuanua 'ana togeu. 19 Basenadi ma yaku tokemaiga igodi nuanuaku ve'etobodanidi i maiaga Mosese 'wainega a da vevematayakeyakedi, siwe kebu 'aku fata bega a bailedi a damana Keliso 'waineye 'wa da vo a da wafa ve'etoboda 'waidiega. A bailedi bega tutuya de'e 'aku fata yaku mia matatabuna 'waidie Yaubada yana nuanua a na vevematayakeyakedi. 20 Tutuyanina Keliso i wafa 'ai lagalagana 'waineye, 'wa da vo yau taiadi 'a da wafa, bega tutuya de'e 'akonadi i ageku yana nuanua a 'i'idewadi, we'e yau tauniku yaku nuanua a bailedi, bani'odi a wafa 'waidiega. Mogitana ma tomogoku a miamia, siwe yaku mia matatabuna 'ana 'atumaina a veveluagai vetumagana 'wainega. Yaku vetumagananina a yato-vagaseni Yaubada Natuna 'waineye, taunina 'aku tonuakalikali wata taunina i tauyeni faifaiku i wafa. 21 Yaubada yana nuakalikalinina 'waideye kebu a da baila, nuanuaku. 'Ako tomotoga ta da ve'atumaiga Yaubada mataneye ve'etoboda 'adi vematayakayaka 'waidiega, Keliso yana wafa i da venani-'avo'avovo, kebu ma lamunaga.

S12 Fol 11:2-3S16 Lom 3:20-28; 11:6
S19-20 Lom 6:6; 7:6 Ion 13:1 Gal 1:4